ஆளில்லாத வீட்டுக்கு ரூ.7½ லட்சம் மின் கட்டணம் - பூ வியாபாரி அதிர்ச்சி

திண்டுக்கல், திண்டுக்கல் மாவட்டம் நிலக்கோட்டை அருகே உள்ள லட்சுமிபுரத்தை சேர்ந்தவர் முருகேசன். பூ வியாபாரி. தற்போது இவர், பட்டிவீரன்பட்டியில் வசித்து வருகிறார். இவருக்கு சொந்தமான வீடு, நிலக்கோட்டை அருகே குல்லிசெட்டிபட்டியில் உள்ளது. அந்த வீட்டில் கடந்த 2 ஆண்டுகளாக குடியிருக்காமல் பூட்டி கிடக்கிறது.ஆளில்லாத அந்த வீட்டை, முருகேசனின் உறவினரான அதே பகுதியை சேர்ந்த ரவிச்சந்திரன் என்பவர் பராமரித்து வருகிறார். இந்த வீட்டுக்கு 2 மாதத்துக்கு ஒரு முறை மின் கட்டணமாக சராசரியாக ரூ.120 முதல் ரூ.150 வரை செலுத்தி வந்ததாக கூறப்படுகிறது.இந்தநிலையில் கடந்த 28-ந்தேதி ரவிச்சந்திரனின் செல்போனுக்கு குறுஞ்செய்தி ஒன்று வந்தது. அதில், மின்கட்டணமாக ரூ.7 லட்சத்து 46 ஆயிரத்து 1-ஐ அடுத்த மாதம் (பிப்ரவரி) 17-ந்தேதிக்குள் செலுத்த வேண்டும் என்று குறிப்பிடப்பட்டிருந்தது. இதனைக்கண்ட அவர் அதிர்ச்சியடைந்தார்.இதுகுறித்து மின்வாரிய அலுவலகத்தில் அவர் கேட்ட போது தவறுதலாக அனுப்பப்பட்டு விட்டதாகவும் அந்த கட்டணத்தை செலுத்த தேவையில்லை என்றும் தெரிவிக்கப்பட்டது.