மயாமி ஓபன் டென்னிஸ்: அரையிறுதியில் ஜெஸ்ஸிகா
![மயாமி ஓபன் டென்னிஸ்: அரையிறுதியில் ஜெஸ்ஸிகா](https://img.dinakaran.com/data1/DNewsimages/DailyTamil_News_3_30_2023_51572.jpg)
மயாமி: அமெரிக்காவில் நடக்கும் மயாமி ஓபன் டென்னிஸ் தொடரின் மகளிர் ஒற்றையர் பிரிவு அரையிறுதியில் விளையாட, உள்ளூர் நட்சத்திரம் ஜெஸ்ஸிகா பெகுலா தகுதி பெற்றார். காலிறுதியில் அனஸ்டேசியா போதபோவாவுடன் மோதிய ஜெஸ்ஸிகா 4-6 என்ற கணக்கில் முதல் செட்டை இழந்து பின்தங்கினார். பின்னர் சுதாரித்துக்கொண்டு விளையாடிய ஜெஸ்ஸிகா 6-3 என 2வது செட்டை கைப்பற்ற சமநிலை ஏற்பட்டது. இதைத் தொடர்ந்து 3வது மற்றும் கடைசி செட்டில் அனல் பறந்தது. இரு வீராங்கனைகளும் தங்கள் சர்வீஸ் ஆட்டத்தை தக்கவைத்து புள்ளிகளைக் குவிக்க, ஆட்டம் டை பிரேக்கர் வரை இழுபறியாக நீடித்தது.அதில் சிறப்பாக செயல்பட்ட ஜெஸ்ஸிகா 4-6, 6-3, 7-6 (7-2) என்ற செட் கணக்கில் 2 மணி, 36 நிமிடம் போராடி வென்று அரையிறுதிக்கு முன்னேறினார். மற்றொரு காலிறுதியில் இத்தாலி வீராங்கனை மார்டினா டிரெவிசானை எதிர்கொண்ட எலனா ரைபாகினா (கஜகிஸ்தான்) அதிரடியாக விளையாடி 6-3, 6-0 என்ற நேர் செட்களில் எளிதாக வெற்றியை வசப்படுத்தி அரையிறுதிக்கு தகுதி பெற்றார். இப்போட்டி 1 மணி, 9 நிமிடத்திலேயே முடிவுக்கு வந்தது. அரையிறுதியில் ஜெஸ்ஸிகா - ரைபாகினா மோத உள்ளனர். அல்கரஸ் முன்னேற்றம்: மயாமி ஓபன் ஆண்கள் ஒற்றையர் பிரிவு 4வது சுற்றில் களமிறங்கிய நம்பர் 1 வீரர் கார்லோஸ் அல்கரஸ் (ஸ்பெயின்) 6-4, 6-4 என்ற நேர் செட்களில் அமெரிக்காவின் டாமி பவுலை வீழ்த்தி காலிறுதிக்கு தகுதி பெற்றார். ரஷ்யாவின் மெத்வதேவ், கரென் கச்சனோவ், இத்தாலி வீரர் யானிக் சின்னர், அமெரிக்க வீரர்கள் டெய்லர் பிரிட்ஸ், கிறிஸ்டோபர் யூபேங்க்ஸ் ஆகியோரும் காலிறுதிக்கு முன்னேறி உள்ளனர்.
மூலக்கதை
![](https://www.tamilmithran.com/img/apple_icon.png)