முதல் டெஸ்ட்: இலங்கை - ஆஸ்திரேலியா இன்று மோதல்

காலே, இலங்கைக்கு சென்றுள்ள ஆஸ்திரேலிய கிரிக்கெட் அணி தலா 2 போட்டிகள் கொண்ட டெஸ்ட் மற்றும் 2 ஒரு நாள் போட்டிகளில் விளையாடுகிறது. இதில் இவ்விரு அணிகளுக்கு இடையே முதலில் டெஸ்ட் தொடர் நடைபெறுகிறது. அதன்படி இவ்விரு அணிகளுக்கு இடையிலான முதலாவது டெஸ்ட் போட்டி காலே மைதானத்தில் இன்று (புதன்கிழமை) காலை 10 மணிக்கு தொடங்குகிறது. ஆஸ்திரேலிய கேப்டன் கம்மின்சுக்கு ஓய்வு அளிக்கப்பட்டுள்ளதால் அணியை ஸ்டீவன் சுமித் வழிநடத்துகிறார். இந்த தொடரில் டிராவிஸ் ஹெட் கவாஜாவுடன் இணைந்து தொடக்க ஆட்டக்காரராக ஆடுவார் என்று அறிவிக்கப்பட்டுள்ளது.சொந்த மண்ணில் ஆஸ்திரேலியாவுக்கு அதிர்ச்சி அளிக்கும் முனைப்புடன் இலங்கை களமிறங்க உள்ளது. அதேவேளை டெஸ்ட் சாம்பியன்ஷிப் இறுதிப்போட்டிக்கு முன்னதாக நடைபெற கூடிய கடைசி டெஸ்ட் தொடர் இது என்பதால் வெற்றியுடன் நிறைவு செய்ய ஆஸ்திரேலியா முழு மூச்சுடன் போராடும். எனவே இந்த தொடர் ரசிகர்கள் மத்தியில் ஆர்வத்தை ஏற்படுத்தி உள்ளது.