இந்தியாவுக்கு எதிரான 3-வது டி20: வெற்றிக்குப்பின் இங்கிலாந்து கேப்டன் கூறியது என்ன..?

ராஜ்கோட், இங்கிலாந்து கிரிக்கெட் அணி இந்தியாவில் சுற்றுப்பயணம் மேற்கொண்டு 5 போட்டிகள் கொண்ட டி20 தொடரில் விளையாடி வருகிறது. இதில் நடைபெற்ற முதல் 2 போட்டிகளில் இந்திய வெற்றி பெற்று தொடரில் 2-0 என்ற கணக்கில் முன்னிலையில் இருந்தது. இதனையடுத்து இவ்விரு அணிகளுக்கு இடையிலான 3-வது டி20 போட்டி நேற்று முன்தினம் நடைபெற்றது.இதில் டாஸ் வென்ற இந்திய கேப்டன் சூர்யகுமார் யாதவ் பந்து வீச்சை தேர்ந்தெடுத்தார். அதன்படி முதலில் பேட்டிங் செய்த இங்கிலாந்து அணி 20 ஓவர்கள் முடிவில் 9 விக்கெட்டுக்கு 171 ரன்கள் சேர்த்தது. அதிகபட்சமாக பென் டக்கெட் 51 ரன்கள் அடித்தார். இந்திய தரப்பில் வருண் சக்ரவர்த்தி 4 ஓவர்களில் 24 ரன்கள் மட்டுமே விட்டுக்கொடுத்து 5 விக்கெட்டுகளை அள்ளினார்.பின்னர் 172 ரன்கள் இலக்கை நோக்கி ஆடிய இந்திய அணி சீரான இடைவெளியில் விக்கெட்டுகளை இழந்து தடுமாறியது. முன்னணி வீரர்களான சாம்சன் (3 ரன்கள்), சூர்யகுமார் யாதவ் (14 ரன்கள்), திலக் வர்மா (18 ரன்கள்) சொதப்பியது அணிக்கு பின்னடைவாக அமைந்தது.20 ஓவர்கள் முழுமையாக விளையாடிய இந்திய அணி 9 விக்கெட்டுகளை இழந்து 145 ரன்கள் மட்டுமே அடித்தது. இதனால் இங்கிலாந்து 26 ரன்கள் வித்தியாசத்தில் நடப்பு தொடரில் முதல் வெற்றியை பெற்றது. இந்தியா தரப்பில் அதிகபட்சமாக ஹர்திக் பாண்ட்யா 40 ரன்கள் அடித்தார். இங்கிலாந்து தரப்பில் ஜாமி ஓவர்டான் 3 விக்கெட்டும், ஜோப்ரா ஆர்ச்சர், பிரைடன் கார்ஸ் தலா 2 விக்கெட்டும் வீழ்த்தினர். அந்த அணியின் முன்னணி சுழற்பந்து வீச்சாளரான அடில் ரஷீத் ஒரு விக்கெட்டை மட்டுமே வீழ்த்தியிருந்தாலும் சிக்கன பந்துவீச்சை (4 ஓவரில் 15 ரன்கள்) வெளிப்படுத்தி இருந்தார்.இந்நிலையில் இந்த போட்டியில் தாங்கள் அடைந்த வெற்றி குறித்து பேசிய இங்கிலாந்து அணியின் கேப்டன் பட்லர் கூறுகையில், "இந்த போட்டியில் நமது அணியில் பந்துவீச்சாளர்கள் மிகச்சிறப்பாக பந்து வீசியிருந்தனர். பந்துவீச்சாளர்களது இந்த மிக சிறப்பான செயல்பாடே இந்த வெற்றிக்கு காரணமாக நினைக்கிறேன். அதிலும் குறிப்பாக அடில் ரஷித் மிகச்சிறப்பாக பந்து வீசினார். அவரிடம் ஏகப்பட்ட வேரியேஷன்கள் உள்ளன. ஜோப்ரா ஆர்ச்சரும் மிகச்சிறப்பாக பந்து வீசி இருந்தார். மார்க் வுட்டும் அட்டகாசமான பந்துவீச்சை வெளிப்படுத்தினார். இப்படி பந்துவீச்சில் சிறப்பாக செயல்பட்டதாலே இந்த வெற்றி கிடைத்தது.அதேபோன்று பேட்டிங்கில் பென் டக்கெட் மிகச்சிறப்பாக விளையாடினார். இருந்தாலும் அடுத்தடுத்து விக்கெட் விழுந்தது எங்களுக்கு ஏமாற்றம் அளித்தாலும் இறுதி நேரத்தில் வெற்றிக்கு தேவையான ரன்களை நாங்கள் குவித்தோம். பின்னர் அனைத்தையும் பந்துவீச்சாளர்கள் பார்த்துக் கொண்டனர்" என்று கூறினார்.