நீலகிரி: 'இ-பாஸ்' முறையை ரத்து செய்யக்கோரி வியாபாரிகள் இன்று கடையடைப்பு போராட்டம்

இ-பாஸ் முறையை ரத்து செய்யக்கோரி நீலகிரி மாவட்டத்தில் இன்று கடையடைப்பு போராட்டம் நடைபெறும் என்று தமிழ்நாடு வணிகர் சங்கங்களின் பேரமைப்பு தெரிவித்துள்ளது.மலைகளின் அரசியான ஊட்டிக்கு சாதாரண நாட்களை விட விடுமுறை தினங்களில் வரும் சுற்றுலா பயணிகளின் கூட்டம் அதிகமாக இருக்கும். அதுவும் கோடை விடுமுறை சீசனில் கட்டுக்கடங்காமல் இருக்கும்.இதனால் போக்குவரத்து நெரிசல் ஏற்படும். எனவே சுற்றுச்சூழலை பாதுகாக்கும் வகையிலும், நீலகிரிக்கு சுற்றுலா செல்பவர்களின் எண்ணிக்கையை கட்டுப்படுத்தவும் சென்னை ஐகோர்ட்டு உத்தரவின்படி, கடந்த ஆண்டு மே மாதம் 7-ந்தேதி முதல் நீலகிரிக்கு செல்லும் சுற்றுலா வாகனங்களுக்கு இ-பாஸ் நடைமுறை அமலில் இருந்து வருகிறது.தற்போது கோடை சீசன் தொடங்க உள்ளதால், திங்கள் முதல் வெள்ளிக்கிழமை வரை வாரநாட்களில் 6 ஆயிரம் சுற்றுலா வாகனங்களையும், சனி மற்றும் ஞாயிற்றுக்கிழமை ஆகிய வார இறுதி நாட்களில் 8 ஆயிரம் வாகனங்களையும் மட்டுமே அனுமதிக்க வேண்டும் என்று ஐகோர்ட்டு கட்டுப்பாடு விதித்து உத்தரவிட்டது.இந்த கட்டுப்பாடு நேற்று முன்தினம் நள்ளிரவு முதல் அமலுக்கு வந்தது. அதன்படி, மேட்டுப்பாளையத்தில் இருந்து கல்லாறு மற்றும் கோத்தகிரி வழியாக ஊட்டி செல்லும் வாகனங்களை இ-பாஸ் பதிவு செய்யப்பட்டு உள்ளதா என கல்லாறு, குஞ்சப்பனை சோதனை சாவடிகளில் போலீசாரும், வருவாய்த்துறையினரும் சோதனை செய்கிறார்கள். இதன் பின்னரே மேற்கொண்டு செல்ல அனுமதிக்கிறார்கள்.இதேபோல் கேரள, கர்நாடக மாநிலங்களின் எல்லையில் உள்ள சோதனை சாவடிகளிலும் சுற்றுலா வாகனங்களை சோதனை செய்து அனுமதிக்கிறார்கள். கூடுதல் ஊழியர்கள் இல்லாததால், இ-பாஸ் சோதனை செய்வதில் சிரமம் ஏற்பட்டது. சோதனை நடைமுறைகள் முடிவதற்கு தாமதமாகியதால் மலைப்பாதையில் வாகனங்கள் நீண்ட நேரம் காத்திருந்தன. இதனால் சுற்றுலா பயணிகள் சற்று சிரமம் அடைந்தனர்.இ-பாஸ் பதிவு செய்யாமல் வந்த சுற்றுலா பயணிகளின் வாகனங்களை, ஊட்டிக்கு செல்ல போலீசார் அனுமதி மறுத்தனர். எனவே நடுவழியில் நின்று சுற்றுலா பயணிகள் இ-பாஸ் பதிவு செய்தனர். ஆனால், மாநில எல்லைகளில் இணையதள சேவை சரிவர கிடைக்காததால் சுற்றுலா பயணிகள் கடும் சிரமத்துக்கு ஆளாகினர்.மலைப்பாதைகளில் ஆங்காங்கே சுற்றுலா பயணிகள் எளிதாக இ-பாஸ் பதிவு செய்யும் வகையில், கியூ.ஆர்.கோடு உடன் கூடிய அறிவிப்பு பலகைகளை வைக்க நடவடிக்கை எடுப்பதாக அதிகாரிகள் தெரிவித்தனர்.இதற்கிடையே தமிழ்நாடு வணிகர் சங்கங்களின் பேரமைப்பு மாநில துணை தலைவர் ஏ.ஜே.தாமஸ், மாநில இணை செயலாளர் அப்துல் ரசாக், மாவட்ட கூடுதல் செயலாளர் பாதுஷா ஆகியோர் செய்தியாளர்களிடம் கூறியதாவது:-நீலகிரி மாவட்டத்துக்கு வாகனங்களில் வர இ-பாஸ் நடைமுறை அமலில் உள்ளது. இந்த நடைமுறையை முழுமையாக ரத்துசெய்ய வேண்டும் என்பது உள்ளிட்ட 12 அம்ச கோரிக்கைகளை வலியுறுத்தி தமிழக அரசின் கவனத்தை ஈர்க்கும் வகையில் 24 மணி நேர கடையடைப்பு உள்பட பொது வேலைநிறுத்தம் இன்று (புதன்கிழமை) நடைபெறுகிறது.மாவட்டத்தில் கடைகள், ஓட்டல்கள் உள்பட அனைத்து வணிக நிறுவனங்களும் மூடப்படுகிறது. அதோடு ஆட்டோ, ஜீப், கார், வேன் உள்பட சுற்றுலா வாகனங்கள் ஓடாது. இதனால் நீலகிரிக்கு வருவதை சுற்றுலா பயணிகள் தவிர்க்க வேண்டும். மேலும் இ-பாஸ் நடைமுறைக்கு எதிராக 15 நாட்களுக்குள் நீதிமன்றத்தில் மேல்முறையீடு செய்யப்படும் என மாவட்ட நிர்வாகம் உறுதி அளித்துள்ளது.இதேபோல் வணிகர் சங்கங்களின் பேரமைப்பு சார்பிலும் நீதிமன்றத்தில் மேல்முறையீடு செய்யப்படும். இவ்வாறு அவர்கள் கூறினர்.